Potongan surga di Pulisan

Sama deng cuti - cuti sebelumnya,for mengisi cuti lebaran kali ini kita pigi di tampa wisata yang kalo di dalam kampus cuma bole mo lia di sosmed deng baca orang pe komentar tentang tu tampa.

Tiap tujuan perlu direncanakan, sebelum pigi di tampa tujuan torang rapat dulu di tampa kopi, kopi dalam botol yang ada depe persen ! Torang disini kita deng tape tamang - tamang SMA.

Pas rapat, yah torang isi deng pembicaraan yang seharusnya no katu depe contoh tukar jalur (baca:arisankejeng), lia parampuang, ba gosip orang pe kehidupan, deng baku hina. Mo bagemana le, namanya cowo kalo so kumpul, torang pe bacerita nda mo jao - jao dari bisnis masa depan, politik sosial budaya, deng semangat cinta tanah air.

Mar musti inga bae - bae torang bahas itu kalo so klar cerita Parampuang deng Bacerita Porno !

So lala tatawa tamang, tatawa diri sandiri, deng tatawa orang meja disbla, yah torang pulang, ada yang pulang bahagia, ada yang pulang murung karna dapa gara, deng ada yang pulang tako karna so nda angka papa pe telpon 7 kali !

Kali ini torang pigi di pante pulisan ! 

Sengaja torang pilih weekday supaya nda rame, deng tamang - tamang le banya yang so klar urus semester, urus semester bukang urus skripsi ! Ada le yang so klar urus bini, io kasiang tepe tamang so ja urus bini, orang pe bini jelasnya !

Perjalanan kasana torang pilih pake motor, sengaja biar capat kata, ntau mo capat - capat apa sto, mar dari cara berkendara capat pigi rumahsaki ! 

Torang sampe disana jam 12 siang, dengan penuh pengetahuan deng jiwa bolotu yang tape tamang punya torang putuskan nda usah nae kapal for pigi di tampa yang memang depe spot for ba foto gaga. 

Jadi bagemana kasana ? Torang bajalang, menyusuri pinggir pante ! Jam 12 tamang di pinggir pante le ! Io ngoni budo mar kita ? Shit le kwa mar ini sto tu orang bilang " demi pergaulan kendati siksa ni diri" !

Torang bajalang balompa batu deng karang pake jeans, lebe jelas jeans sempit yang amper sama deng legging ! kanal ombak, deng tajumur matahari, ta ciong tape bobou so sama deng anak SD yang nda tidor siang kong pi tangka ikang di got ! Asang skli komang !

Stenga perjalanan bajalang lancar, depe sisa ? Torang amper mati ! 

Mungkin ngoni yang da baca bilang duh lebay masa le mo mati, mar tamang ini komang butul ! Cuma karna tape tamang pe bolotu nmau mo kase kaluar doi 25 ribu, torang akhirnya musti mo mendaki tu tebing jurang di pulisan sana ! Nae turung gunung, kita so nda mampu komang, musti bawa ni diri yang ada gumpalan - gumpalan lemak sisa ragey deng babitore !

Ada yang so putus asa mo babale ulang, ada yang so kumpul daong kring kong dia bakar, ada yang mimisan deng ada yang ba selfi ! Mungkin yang ba selfi ini depe insting terancam so nda peka' sto !

(Pokoknya bukang kita 👆👆👆)

So baku marah akhirnya torang putuskan tetap mendaki ! Yang awalnya kalo pake kapal nda sampe 10menit, torang da bajalang kaki ini so lebe 2jam ! Ba paksa sambil baku kase salah akhirnya torang sampe di puncak yang tu orang ja ba foto akang, torang so nda peduli deng ba foto, duluan torang cari warong ! Pas pe lia warong sama deng da lia potongan surga jatung di pulisan ! Sunggu komang snang skli.

Pas torang ba beli minum tanta yang jaga warong sampe da tanya "Da tumbus dari mana ngoni nyong ? Nyanda ada komang tu ja lewat situ, kage ngoni so beking jalang baru sto ?" Da dengar itu smo mangis kita komang ! So tacukur - cukur karna kusu - kusu ( tu rumpu tinggi kong tajang! ) so ta kremos karna ja ta lucur mar akhirnya bole sampe jo torang deng slamat.

Tong pe perjalanan kali itu sering kali sama deng jalan hidop, terkadang ada jalan gampang mar torang pilih tu susah. Terkadang le for mo capai satu tujuan musti beda - beda tu jalang ada yang cepat, ada yang lama, ada yang harus mendaki, ada yang cuma jalan santai, ada yang musti sampe badara, ada yang cukup seka suar so sampe. Mar dari jalang susah yang torang da pilih pas sampe tujuan komang memang rasa puas skli komang, terkadang ketika torang dapa seauatu deng cara gampang torang ja sampe lupa bersyukur.

Mungkin sama pas torang minta sesuatu pa Tuhan (jodoh,contoh!) terkadang ketika Tuhan cepat respon malah torang nda syukuri, mar ketika Tuhan kase di waktu yang tepat torang mo bahagia deng mo bersyukur skli.

Belum ada judul !

Neng ning nong..
Selamat tanggal sebilanbelas, maaf baru mo bagi ulang sadiki tentang tape hidop, so lama nda bbacerita karna skarang so mulai sibuk kuliah, nyanda dapa rasa so smester ampa skarang padahal rasa baru kemaren jadi anak kuliahan yang di penjara (itu dpe rasa mar pas da jalani, barasa so sampe ada kacili umur tiga taon, ngoni byangkan jo depe lama)
Ngoni mungkin perna baca tape cerita sebelum sebelumnya tentang tape kisah gagal move on yang alay, skarang ta mo berbage ulang sadiki deng ngoni pembaca yang kepo, tentang cowo ganteng berjerawat, hitam, dan sudah mulai punya rambut ;)

Tape mantan so kaweng, mungkin ada yang so tau, ada le mungkin yang baru tau dari tape blog ini
Kesan pertama ? Yang pasti shock ! Da baca tu undangan merah timbul banya rasa dalam ni hati, ada rasa nda percaya, rasa mo tatawa, rasa mo nda trima,  deng rasa lemon. Io kita suka lemon, bukang emon !
Tentang rasa nda trima, bukang karna kita belum bisa move on mar co ngoni bayangkan, cewe yang perna jadi satu warna di nga pe masa SMA, memang bukang cuma dia tu warna di ini hidop mar dia  beda, dia so jadi warna yang boleh mo dominasi warna laeng dalam tape hidop, banya yang kita blajar waktu deng dia, warna yang boleh beking nga lupa waktu, lupa pulang, deng lupa mo lia warna laeng  karna so ta dominasi deng satu warna itu.

Pas kita beking status "selamat tanggal 6, semoga bahagia deng hidop baru, love u" amper samua tamang SMA yang batamang deng kita di BBM langsung komen.
Komen bervariasi, ada yang bagara, ada yang ba kase semangat, ada yang beking jadi bahan tatawa deng banya le laeng - laeng. Io kote amper lupa ada yang kase ayat alkitab, ngoni bayangkan jo itu, sampe kase ayat alkitab pa kita, se rapuh itu so kita ? Io, ta rapuh mar itu dulu bos

Sering waktu bajalan, ta mulai buka lembaran baru, memang lama mar samua ada akhir. Ta mulai dekat deng brapa cewe, saling berbage cerita, baku telpon, sampe ada so bajalang sama mar ta rasa blum ada yang pas. Sampe ada brapa orang yang so ba curhat pa depe tamang kalo ta cuma suka PHP, ta bukang cowo bagitu, bukang cowo yang beking nyaman kong ilang, ta cuma bulum rasa pas, sama deng babli baju terkadang ada baju yang ngoni so suka mar dp ukuran nda pas deng ngoni pe badan, bagemana ? Mo paksa ? Bantar tarobe.

Pas kita pinda kampus baru di kalimantan barat, kita datang deng tape tamang cewe dua orang dari SULUT, dorang dua cewe gaga. Mungkin karna talalu serin baku dapa, kita kana cinta lokasi deng salahsatu tape tamang cewe. Masing - masing saling jaga prasaan waktu itu, saling kase perhatian, kase tunjun yang terbaik satu deng yang laeng. Yah ngoni mangarti jo no masa PDKT, masa paling indah sama indah deng sama SMA, masa paling indah mar dimnana ngoni musti kase tinggal itu for maso di step brikut, karna seindah apapun torang nda bole mo di itu zona nyaman trus, torang musti brani for kase tinggal tu zona nyaman for bole maso zona baru, supaya torang bole dapa yang lebe mar depe resiko proses for dapa lebe itu pasti nda akan senyaman zona yang lama.
Waktu bajalang, pas kita pe ulangtahun dia kase tanda, akhirnya ta branikan diri for mo tanya pa dia. Waktu itu ta pangge dia lari sore sama-sama, io kasiang,  ngoni mangarti jo torang di sini semi penjara jadi kalo mo nge-date paling olahraga sama-sama ato pigi kantin, beda kalo di luar boleh cari tampa makang bagus, ato pigi tampa bagus supaya boleh mo dapa depe feel yang lebe romantis.
Nmau mo ilang kesempatan,ta siapkan yang terbaik, ta so susun kata-kata bagus mar pada akhirnya,pas bacerita langsung otak langsung nda bakerja, samua ilang dari pikiran mar so terlanjur basa jadi bacolo jo te' satukali.
Ta jadi deng dia, awal -awal kampus torang dua punya, pusing bebe deng tu laeng mo bilang apa mar itu nda lama, kita pe orang talalu posesif mungkin karna talalu lama sandiri, tu ego ba ator talalu tinggi kong dia pe orang nda suka ta mo ator tamba le depe orang talalu menutup diri akhirnya...    putus.

Mungkin karna dekat deng salalu baku dapa ta deng dia bacerita ulang, bicara bae-bae deng dia kong akhirnya saling minta maaf, kong keadaan bodok-bodok terjadi, sama-sama mangaku salah, ta "bilang ta yang salah", dia bilang nyanda, dia yang salah, mar karna gengsi ta tindis ulang, "nyanda ini smua tape salah", nmau kala le dia le bilang "doh nyanda ini kita yang salah", akhirnya ta bilang "io ngana yang salah jo dang", ta kita somo klar, dia bale marah pa kita, dia bilang "so gila sto ngana masa kita tu salah!", akhirnya hening mar ta deng dia jadi ulang. Samua nyanda lama, ja bakalae karna beda pendapat, akhirnya saling menutup diri kong nynda bicara, hilang samua, senyum malo pas ja baku dapa so nda ada, saling jaga prasaan waktu masih PDKT sirna.
Waktu trus bajalng samasama saling memerhatikan dari jaun dan saling melupakan.

Kirakira dua bulan berlalu,waktu itu tape tamang pangge pesiar kong nda sengaja ta baku dapa satu oto deng dia, deng prasaan gengsi torang dua baku haga, baku badiam sama deng orang bodok. Tamang - tamang gara akhirnya sebagai cowo ta branikan diri for batanya duluan. Bacerita ulang, tatawa , suasana mulai cair, seakan baku mangarti, kota pontianak yang biasa panas brubah mendung kong turung ujang, suara klakson oto di jalang yang padat, tamang-tamang pe ribut, torang so nyanda acu, ini ta deng dia pe hari, pe jam, pe samua.

Terbawa suasana and we kiss.

Pulang pesiar,deng pikiran senang kita basadia for mo mandi, abis mandi ta cek hp, dia da ba telpon. Ta telpon bale, ta tanya kiapa dia ba telpon dia cuma badiam. Brapa detik kemudian dia minta putus, ngoni bayangkan jo itu ! Pikiran ? Io ! Mar mo bagemana le, dengan alasan klasik dia bilang kita bole dapa yang lebe bae dari dia, ta deng dia dekat mar dekat sama deng sudara jo. So ntau mo bilang apa, ta io akang deng rasa emosi campur kecewa, ta bilang nda usah dekat jo te sama skli torang, nda usah jo te baku togor ato apalah.

Sampe ini cerita kita posting, ta deng dia blum bacerita langsung, paling cuma di bbm, pas waktu itu le kita pe kaki perna da luka deng pas dia da saki torang baku bbm, pas ja baku dapa langsung cuma ja baku haga kong buang muka ulang, lanjut ulang deng urusan masing-masing.
Ta nda tau kiapa, mungkin so ada cowo ato ada alasan laeng,ta bulum tau, cuma mo bilang makase so jadi motivasi dikampus kalbar, lampus besae kong panas le.

Terkadang, banyak hal yang torang nda mangarti dalam hidop ini, apa yang torang rencanakan, terkadang salalu jao dari harapan. Tetap senyum jo biar so saki, badai pasti berlalu, setidaknya ada pembelajaran yang ta bole ambe selama ta jadi deng dia.

Disini mungkin ta bole balajar, jang talalu paksa torang pe mau tu mo jadi, tengkadang jadi pendengar nyanda salah, nda salamanya torang pe mau tu musti jadi, bukti ta boleh mo brubah ta so nmau ganggu pa dia.

MATA,HATI,PIKIRAN

Akademi Kepolisian ato yang biasa torang bilang Akpol dulu perna jadi satu mimpi besar dalam tape hidop,yah mar smua sirna sudah pas kita lia tape nilai ujian nasional nda sesuai deng ketentuan for maso akpol,ngoni tau pas itu smua stres bukang cuma kita, tape papa deng mama ley kasiang stres deng kecewa pas tau kita pe nilai akhir Ujian Nasional nd sesuai deng ketentuan, karna kasiang dorang so siska da urus spaya kita boleh tumbus. Bukang cuma lalah fisik (kasanakamari tiap hari baku dpa orang),biaya ley so banya da kaluar,ngoni tau to ? tutup-tutup ala ley so jadi rahasia umum kwa tes maso polisi skarang smua perlu doi mar ujung-ujung apa ?kita sandiri jo yang rusak rencana,kalo difilm kita tu pemeran utama kong kita sandiri yang rusak tu film!

Akpol gagal pindah dokter
Tes dokter ley orang yang pegang pa kita lao-lao,nmau bilang kalo nembole urus saampe kita lolos,cuma jaga jawab "ioio,boleh", ujung-ujung orang tua kecewa lagi. Karna qapa ? io no,nyanda lulus lagi!

Ngoni tau lulus SMA bukang kurang tu masalah mar rupa jadi tamba banya maslah,yang dp awal cuma tau ba tada doi pas so lulus tu keuangan kandas,mo minta doi so malo mo cari kerja baru lulus SMA sedang sarjana blum tantu dpa trima akhirnya cuma MT(Makang Tidor)!
Polisi nyanda lulus,dokter nyanda tumbus akhirnya dari pada cuma makang tidor dirumah tpe orangtua suruh kuliah.Kumpul-kumpul deng tamang-tamang baku berbage cerita akhirnya ta putuskan maso Teknik. Dp lebe jelas Teknik Sipil. Ta iko tes,iko smua persyaratan akhirnya kita jadi mahasiswa dikampus biru,kampus orang nyanda ja lulus-lulus,kampus para penjahat,kampus pemabuk,mar ada satu hal yang beda deng fakultas laeng kampusbiru cuma yang boleh beking dp sesama mahasiswa boleh mo dapa rasa apa dp nama batamang ! Bagambar,bagambar,deng bagambar sampe ja tidor dikampus krna bagambar jadi torang pekeseharian.Tiga bulan berlalu,tape papa dapa kabar kalo ada penerimaan IPDN ato dp nama dulu STPDN ato dp nama top di TV skolah pukul-pukul.Ta nemau mo iko dp tes,apalagi skola disitu,cuma mo bmna ley ? Mo beking kecewa orang tua le? Anak mana le yang mo suka beking kecewa dp orangtua deng sengaja to ? Cukup jo dorang kecewa diAkpol. Kita dengan sangat terpsksa iko tes, mar jujur jo ngoni tau kita lebe rela maso klas 3 SMA ulang spaya kita boleh dapa nilai lebe bagus sadiki kong mo tes akpol ulang.Mar Tuhan da kehendak laeng,kita lulus di IPDN. Akhirnya kita brangkat ka Jawa.
Inga torang pe hidop dikampus nda sama gaga deng torang pe baju dinas !
Awal pendidikan disana kita pe pikiran cuma mo lari dari pendidikan,mar ta ja pikir-pikir kita kalo mo lari mo pigi kmna ?tamba le orangtua mo bilang apa pa kita kalo ta lari ? akhirnya niat melarikan diri batal,pas itu kita kalo ada waktu luang pas pendidikan awal, ta lebe fokus for kase kuat mental deng cara lebe kase dekat diri pa Tuhan,tiap ada waktu kita baca alkitab deng berdoa. Tiap hari itu cuma kita pekerja,yang laeng dudu-dudu dikantin makang donat, kita dudu dibawa lampu 5watt warna kuning le kong babaca Alkitab,kita ja berdoa Tuhan kiapa kita boleh maso disini,hidop semimiliter beda 180' dari ta pe kehidupan sebelumnya.
Kalo kumpul deng tamang-tamang torang kurang jaga baku kase kuat,saking nda bisa trima perubahan keadaan yang awalnya nyaman pinda jadi sederhana mungkin, tape berat badan turung jao
Mar itu crita awal-awal pendidikan
Stenga taon berlalu,suka - duka  pendidikan kita boleh jo kote lalui deng menyesuaikan diri deng tu keadaan kampus yang beda deng kampus-kampus normal yang laeng. Disana kita blajar bersyukur,menghargai,mandiri,deng badusta.
Badusta disini dp artian bae torang kasiang biar so saki-saki kong so nyanda da doi mar kalo ja baku telpon deng orangtua salalu ja bilang da sehat-sehat deng masih banya doi ditangan,ja dapa tanya soal makanan salalu torang jawab makang sini sadap netau ini hitungan 5 nasi wajib habis !
Biar mo bmna le,so ini tu tape kehidupan.Nda dapa rasa 1 taon berlalu skarang kita so tingkat II,nae tingkat brat badan baku iko nae,so sama ulang deng waktu masih SMA,pikiran akhirnya mulai tabuka,ta ja pikir-pikir so butul ta so skolah disini.Kalo yang laeng pas smo lulus kuliah so bingo mo kamana,setidaknya kita pas lulus darisini so langsung kerja. Memang no katu tu orang ja bilang PNS itu nda mo kaya, lebe bae ngana maso ini ato itu ato yang sana,yah kalo orang ja bilang bagitu kita cukup senyum jo karna dorang nda perna tau dp susah sampe kita boleh disini skarang,setidaknya kita so mandiri,deng so nyanda beking orang tua susah (titik)
Kalo mo bicara materi, kita le mau lebe no katu,kalo diPNS kurang nanti ta pe pande-pande no mo ba usaha.Tuhan kwa maha melihat.

Terkadang torang cuma boleh ba rencana, kalo mo pikir-pikir kalo cuma mo masalah materi tape orangtua masih boleh mar cuma terkadang doi memang nembole mo beli segalanya, terkadang torang pe rencana yang dalam tong pe pikiran paling bagus mar Tuhan tentukan laeng bukang karna mo kase susah mar mungkin karna ada Tuhan pe rencana lebe bagus dari kita pe rencana,deng lebe bagus dari ajusbe pe rencana
Mungkin kalo kita kuliah diKedok,paling kita nyanda lulus-lulus,yah mungkin memang so ini tape jalang jadi PNS. Sedangkan Akpol bagi kita so sama deng baju SMA yang so coret-coret,kurang mo jadi kenangan mar so nembole mo pake ulang.


Kita ja senyum pake tape baju dinas bukang karna kita pe hidop so sempurna,mar itu ta pe cara bersyukur for berkat yang Tuhan so kase O:)

Jerman maafkan saya

Kelas 3 SMA..
Ini akhir dari smua prjuangan mncari tiga lembar ketas (ijazah) mmg no katu blum dapa yang ktiga mar stidaknya ini so taon trakir..
 Skrg ta so rajin batulis,beking tugas,denk dengar pa enci dnk mener ba khotba for mo dapa drg p Hati dnk Nilai ! Pas ta so dpa drg p Hati (nd usah pikir ane2) pas smo penentuan kelulusan nanti pasti drg bantu pa kita :D jujur jo no,qt katu mmg bukang anak rajin sama dnk tmg2 laeng jadi ta cuma mo boleh bakuat di akir taong ini..
Klar SMA ini ta p tujuan so ada,bukang cuma ada mar so banya le te' (kalo kaweng blum)
Salah satu Kuliah di jerman,sdappp sklii..
Qt smo sma dnk tu anak pande-pande skli jo yang tiap hari pegang polpen + mangada buku..
Ta so bicara ini dnk tpe org tua,tpe org tua masih bisa sanggupi kta,cuma smua bale pa kita..
Drg cuma bilang "Asalkan nga mampu orangtua mo usaha no katu",pewai ta sok no ta da dengar.. qt sebagai anak yang berkemungkinan sangat besar di DO pas kuliah di jerman tako no katu.. Soalnya qt kasiang bukang dri kluarga yang kaya kong dp biaya for mo kuliah di sana besar skli..
Ta so mulai pertimbangkan ulg no
Mmg no katu kalo kuliah di sana bergengsi,dalam artian kalo tpe mama ato papa p tmg tanya "Anak yang tua so di mna ?" paling drg mo ada satu kebanggan tersendiri le to mo bilang "So kuliah di jerman dia"
bukang cuma itu kalo qt sukses di sana palingan tpe peuang for mo jadi org yang sukses di Indo besar skli + le ta smo banya teman bule dnk yang lbe penting le ta smo boleh rubah keturunan ( Cari bini orang jerman) dnk masih bnya keuntungan laeng no katu
selain bnya keuntungan,bnya le dp hal biasa le
yang kecil2 jo dlu antaralain momasa,bacuci sandiri + pas saki urus diri sandiri + pas suka mo makang mie goreng (indomie) musti pigi di Italy dlu -_-(di eropa cuma di Italy jual indomie)
dp kemungkinan gawat besar-besaran berikut
pertama,kemungkinan dapa DO besar skli
kdua,kalo pun nd dpa DO paling susah mo dpa tmg karna qt yang paling bogo di klas sto
ktiga,kage pas di sana qt dapa 1 kmar dnk orang ane (cwo)
kempat,ini yang plingg parah kage kong qt p CD basa smua kong ta mo pinjam dia punya kong dia nd kase,bmna itu kn gawat skli :D
dnk masih bnya le kmungkinan laeng

Jadi setelah pertimbangan cukup panjang akhirnya qt pilih maso di Unsrat jo
Alasan
1.Kemungkinan DO 0,1%
2.Kalo nd lulus,bayar tu enci dnk mener
3.Tu doi for mo les basa jerman (250jt) ta boleh bli oto
4.kalo mo bli indomie kurang bjlang 10 langka

masih pnjang sbenarnya mar sekian jo dlu ;;)

K A R M A !

Inga smua yang torang ja beking pa orang ada dpe K A R M A ! Jadi nd usah mo tlalu "Sok" jago,biasa2 jo..

Salah Maksud !

ALAY itu ATEIS

Qap ta bilang bgtu ?
Karna dorang nd percaya denk nd kenal pa TUHAN

Dorang cuma percaya p 7uH4n !

For DIA :)

Qt so brubah ?
Io so ? Ta rasa ta nd brubah,qt masih qt yang dulu..
Memang no ada sdki perubahan fisik,skrg ta so tambil denk gaya rambut baru ato boleh mo bilang gaya kapala baru..
Slain rambut ada le yang brubah,qt p jerawat so nd ada :)
Pasti ngo mo bingo pas da baca qt so nd ada jerawat.. io to ?
Io kasiang qt p jerawat so nd ada,so nd ada tampa le for "dia" mo kluar !!!
Lewat jo..

Prubahan fisik itu wajar,secara kata kwa qt kan lebeh hari so lebeh dewasa (Ahayde')
kalo mo bilang prubahan kelakuan ato sifat,ta rasa nd no..
Qt masih Edwin Astron yang dulu..
Qt masih Edwin Astron yang sayang pa ngana..
Qt masih Edwin Astron yang suka pa nga bukang karna nga so ada oto
Qt masih Edwin Astron yang suka pa nga bukang karna nga orang "ADA"
Qt masih Edwin Astron yang dulu,yang masih di 'sini' tunggu pa nga..
Denk yang paling penting,Qt masih Edwin Astron yang slalu mo ada pa nga,denk mo slalu jaga pa nga !

Ta nd perna brubah,qt masih qt yang dulu..
Ta nmau orang laeng b'dekat pa nga karna ta nmau ada orang yang mo kurang ajar akang pa nga..
Ta bukang nd percaya pa nga,ta cuma K H A W A T I R denk nga p keadaan skrg :)